Cussegl grond

Il Cussegl grond è il parlament dal chantun Grischun ed ha 120 sezs. Quels vegnan repartids sin 39 circuls electorals tenor il dumber d'abitantas e d'abitants. Las commembras ed ils commembers dal parlament vegnan elegids dal pievel en la procedura electorala da proporz per ina perioda d'uffizi da 4 onns. Politicamain è il Cussegl grond dividì en fracziuns. Il presidi dal cussegl e la coordinaziun èn chaussa da la Conferenza da las presidentas e dals presidents. Il Cussegl Grond ha 8 cumissiuns permanentas. Il Cussegl Grond sa raduna 6 giadas per onn a sessiuns da 3 dis. Las sesidas han lieu per regla en l'edifizi dal Cussegl grond a Cuira. Cun resalva dals dretgs dal pievel pratitgescha il Cussegl Grond sco autoritad legislativa la pussanza politica suprema en il chantun ed è l'instanza suprema da surveglianza. Las incumbensas e las fatschentas dal Cussegl Grond pertutgan tranter auter la tractativa e la deliberaziun da tut las midadas constituziunalas e da las leschas. El elegia ultra da quai ses organs e sias cumissiuns, il presidi da la Regenza sco er las commembras ed ils commembers da las dretgiras chantunalas superiuras.